Ahmed Didat ndërroi jetë!

Në mëngjesin e 08 Gushtit 2005, në qytetin Durbin të Afrikës Jugore pas vuajtjeve nga sëmundja e paralizës totale që i zgjati plotë 9-vjet që nga viti 1996, vdiq thirrësi, daiu, debatuesi botëror publik me priftërinjët krishterë, ngritësi i fjalës së Teuhidit, njohësi i mirë i Islamit dhe i Biblës, shejh Ahmed Didati në moshën 87 vjeçare.

Lajmin e bëri të ditur I. P. C. I. (Qendra Ndërkombëtare për Thirrje në Islam) në web faqen e saj në internet duke thënë se ai jetën e tij ia kushtoi Islamit duke qenë ambasador i islamit në mbarë botën për t’ia bërë me dije botës faqen e vërtetë të Islamit përmes debateve të ndryshme të organizuara në mbarë botën.

Shejh Ahmed Hoosen Deedat lindi më 01. 07. 1918 në Surat të Indisë, ndërsa më 1927 emigron me të jatin në Afrikën Jugore per nevojat ekonomike.

Emri i tij u shqua shumë përmes debateve të ndryshme që i ka pasur me misionarë krishterë të ndryshëm në mbarë botën nga të cilat gjithsesi se më të dalluara kanë qenë debatet me kryepeshkopin e Amerikës dhe atë të Suedisë, të cilat e vërshuan mbarë botën në formë të videokasetave.

Shkaqet më kryesore që e nxitën atë të bëhet mbrojtësi i Islamit e kanë rrënjën në vitin 1936 kur ai punonte në një dyqan që ishte afër një qendre misionare krishtere nga e cila i vinin misionarët në dyqan dhe e provokonin duke ia sulmuar Islamin.

Ai thotë se atëherë nuk ka ditur asgjë më tepër për Islam se sa që ai e ka emrin Ahmed, fal namaz, agjëron, nuk e han mishin e thiut, nuk pin alkool, dëshmon se nuk ka Zot tjetër përveç Allahut (La ilahe il-lall-llah) dhe se Muhammedi është i Dërguari i Tij, etj.

Ai pra i nxitur nga këto provokime të misionarëve fillon të lexojë gjithçka i vjen në dorë nga librat islame dhe ato krishtere, ndërsa në mënyrë të veçantë kur i ra në dorë libri “Idhharul Hakk“ (botuar në shqip me titullin: Ngjadhnjimi i së Vërtetës, Erasmus, Tiranë, 2004) që ishte i pregaditur për debat me misionarët krishterë të Indisë britanike të atëhershme.

Ai në botë me debat të hapur u paraqit së pari herë me debatin e tij të parë botëror më 1977 në sallën Albert Hool në Londër. Pas kësaj vazhdoi zinxhiri i organizimit të debateve të hapura dhe të transmetuara në të shumtën e rasteve edhe drejtpërsëdrejti në televizion, e të cilat më pas e vërshuan botën në formë të videokasetave dhe DVD.

Publikimet e tij janë të përkthyera në shumë gjuhë të botës nga të cilat në: shqip, rusisht, arabisht, urdu, bengali, malaje, frenge, kineze, japoneze, indoneziane, zulu, afrikane, gjermane, norvegjeze, etj.

Franca dhe Nigeria e kanë rrefuzuar të i lejojnë hyrje në këto vende për shkak të “rrezikut“ nga ai. Më 1986 u shpërblye me Cmimin e Mbretit Fejsal ( të Arabisë Saudite) për shërbimet që ia bënte Islamit në fushën e Da’ves (thirrjes).

Allahu e mëshiroftë dhe e shpërbleftë me xhennetet e Tija më të larta. Amin!

Emin Limani,
8.8.2005

Artikujt e paraqitur në këtë sekcion janë mendime dhe komente personale te autorëve dhe nuk korespondojnë domosdoshmërisht me ate që redaksia e Albislam.Com i din për të vërteta.